Mebyon Kernow a vynn govynn rag Reyth Yeth

Posted by on 5 November 2022 News, Press Release

Dy Sadorn an 5es a vis Du a verk ugans bledhen wosa an yeth Kernewek o aswonys gans Governans an RU der Rann II an Chartour Europek rag Yethow Ranndiryel ha Minoryta.

Yn unn kewsel orth kuntelles Gweythresek Kenedhlek Mebyon Kernow dydh an bennbloodh, pennkowser yethow Klr Loveday Jenkin a grodhvolas orth an Governans RU awos aga fowt a skodhyans rag Kernewek.

Yn meth Klr Jenkin: “Gwir yw ragon ni dhe solempnya an ober mas gwrys gans meur a dus rag avonsya an yeth. Mes yn diwettha ugens bledhen, ny wrug Kernewek dos ha bos y’n parder gans yethow keltek erel a’n RU, ha ni ow verkya an 20ves pennbloodh a aswonvos, res yw dhyn chalenjya an Governans RU dhe vetya yn wiw y ambosow rag an yeth.”

Daldraow ragnotys a veu sevys gans Kllr Jenkin a sew:

Kernewek o aswonys marnas yndan Rann II an Chartour, ha Ywerdhonek, Gwydhalek Alban ha Kembrek aswonys yndan Rann III, gans ambosow moy leun ha pell aga ystynnans.

An Chartour BBC a styr “yethow ranndiryel ha minoryta” avel “Kembrek, Gwydhalek Alban, Ywerdhonek hag Albanek Uleth,” yn unn asa yn mes Kernewek a skodhyans darlesans.

Kyns pell Kernewek a vydh an unnsel yeth Keltek y’n Ruwvaneth Unys heb gwythans yn lagha a’n bro. An kynsa Reyth Yeth Kembrek o gwrys yn 1967 ha nessa yn 1993, ha laghow pella re bos gwrys gans an Senedh Kembra. An Reyth Gwydhalek Alban o gwrys gans an Senedh Alban yn 2005. A-gynsow An Reyth Honanieth ha Yeth (Ywerdhon Kledh) a basyas y diwettha lettow yn Chi an Gemmyn.

An Reyth Honanieth ha Yeth (Ywerdhon Kledh) a dhe gans kevarghewyans a beswar milvil a beuns yn Argh a gevarghow rag Yeth Ywerdhonek, mes an Governans RU a hedhas arghasans sodhogel rag Kernewek in 2016.

Yn meth Kllr Jenkin: “Yma edhom dhyn a aswonvos brassa rag Kernewek der Rann III an Chartour Europek hag un Reyth Yeth Kernewek, gans reowta brassa adhyworth korfow poblek avel an BBC ha dehwelans a arghasans orth S. Stefan.

Hi a gorfennys yn unn leverel: “Y fia da dhymm mar pe an omgemeryans rag an yeth Kernewek digresennys dhe Gernow, mes rag henna, yma ethom dhyn a Senedh Kernow gans nerthow leun rag arghasow ha laghow.”