Mebyon Kernow re dhynerghis deklaryans an Governans RU may fydh yeth Kernewek gwithys der Rann Tri a’n Chartour Europek rag Yethow Ranndiryel po Minoryta.

Kernewek o kudhys kyns gans Rann Dew a’n Chartour ha re bia an unnsel yeth Keltek nag o gudhys gans an Rann Tri moyha efan.

Yn-medh Hembrenkyas a’n Parti, Klr Dick Cole

“Ass yw nowodhow fest posedhek an Governans a wra afydhya bos Kernewek kudhys gans Rann Tri a’n Chartour rag Yethow Ranndiryel po Minoryta. Gans henna y fydh dhe Gernewek an keth savla ages yethow keltek aral an Ruvaneth Unys – Kembrek, Albanek hag Iwerdhonek – ha my a vynn aswon gras dhe pubonan neb re gaskyrghas rag an vrassa difresyansow ma rag Kernewek.”

Yn-medh Ys-Hembrenkyas MK, Klr Loveday Jenkin

“Nowodhow splann yw bos Kernewek yn pareth gans Kembrek, Ywerdhonek hag Albanek der an Chartour Europek ha my a vir yn-rag dhe voy kevarghewyans rag an yeth. Mes Kernewek yw hwath an unnsel yeth Keltek heb difresyansow yn lagha RU. My a wayt an deklaryans hedhyw a wra ledya Menystrys dhe avonsya reythyans rag Kernewek skoodhys gans governans, kepar ha’n laghys yeth passyes seulabrys yn Iwerdhon Gledh, Alban ha Kembra.”

Hembrynkyas an Parti, Klr Dick Cole a geworras

“Y kodh bos an ragwir lemmyn rag Governans dhe gesoberi gans an pobel Kernow dhe skoodhya yn-gwell hag avonsya yeth agan Bro. Ha res yw dhyn drehevel war an savla ma dhe surhe bos kenedhlegeth Kernow dastewynnys yn-gwell yn pub gwedh oll a’n governans RU, yn unn synsi akord digresennans gis-Keltek effeythus.”